Waziri wa mambo ya ndani Mwigulu Nchemba atangaza vita dhidi ya wachochezi

Serikali imeliagiza Jeshi la Polisi kukamatwa

viongozi wa kisiasa, wakiwamo wabunge

wanaofanya uchochezi na kusababisha uvunjifu wa

amani.

Agizo hilo limetolewa na Waziri wa Mambo ya

Ndani ya Nchi, Mwigulu Nchemba bungeni jana,

wakati alipokuwa akijibu swali la Mbunge wa

Ulanga (CCM), Godluck Mlinga, aliyetaka kujua

serikali inatoa kauli gani juu ya viongozi wa siasa

ambao wamekuwa wakitoa kauli za uchochezi na

kusababisha vurugu.

Mbunge huyo aliuliza swali hilo la nyongeza,

baada ya awali Mbunge wa Serengeti (Chadema),

Marwa Chacha, katika swali la msingi kutaka kujua

serikali inatoa tamko gani juu ya kuwapo kwa vifo

vya utata wa kisiasa.

Alidai kuwa inapotokea mpinzani kupoteza maisha

katika mazingira hayo, vifo hivyo huwa havipewi

kipaumbele katika upelelezi na hatua kuchukuliwa.

Swali hilo lilionekana kugusa hisia za wabunge

wengi ambao walisimama kuuliza maswali ya

nyongeza akiwamo Mlinga na Mbunge wa Mwibara

(CCM), Kangi Lugola, aliyetaka kujua Watanzania

na wabunge ambao wamekuwa na tabia ya

kuhusisha kila kifo na masuala ya kisiasa

wanachukuliwa hatua gani.

Alisema madai hayo yanaweza kuleta kutoelewana

katika jamii na kutaka yakomeshwe.

Naye Mbunge Viti Maalum (CCM), Angelina

Malembeka, alitaka kujua kama kuna ukweli

wowote kuhusu polisi kupiga raia katika kisiwa cha

Pemba, kwani anachofahamu jeshi hilo kazi yake ni

kulinda raia na mali zao.

Akijibu maswali ya nyongeza, Nchemba alisema

amewaagiza polisi kuhakikisha wanashughulika na

chanzo kwanza cha tatizo kwa kumkamata

kiongozi aliyewatuma wananchi wakafanye vurugu

au maandamano na uvunjifu wa amani, badala ya

kuwakamata wafuasi pekee.

Alisema Watanzania wote wanahaki sawa, hivyo

viongozi wanaowagawa wananchi kwa misingi ya

kisiasa na kuwatengenezea chuki wanapaswa

kupuuzwa.

Aliwaasa wananchi kutokubali kurubuniwa na

kutengenezewa chuki na wanasiasa ambayo

baadaye inawapelekea kupata matatizo.

“Uzoefu unaonyesha viongozi wamekuwa

wakiwachochochea wananchi na wanapopata

matatizo wanakuja hapa bungeni na kuongeana

glasi na wenzao, sasa nimeagiza waanze

kushughulikiwa wao,” alisema.

UDIKTETA

Kuhusu madai kuwa serikali inaongoza kidikteta,

Nchemba alikanusha madai hayo akisema

wanaolalamika ni wale waliozoea kuishi kwa

ujanjaujanja na kutofuata sheria za nchi.

“Natoa onyo kwa wale wote waliozoea maisha ya

kupiga dili kuachana na tabia hiyo na kufuata

sheria kanuni na taratibu za nchi ili waweze

kuisha kwa amani na utulivu,” alisisitiza waziri

huyo.

UCHOCHEZI

Awali akijibu swali la msingi, Naibu Waziri, Hamad

Yusuf Masauni, alieleza kuwa Jeshi la Polisi

limekuwa likitekeleza wajibu wake kwa mujibu wa

sheria na kanuni na halibagui mtu yeyote kwani

na linathamini Watanzania wote.

Alisema jeshi hilo limekuwa likichukua hatua

mbalimbali kwa viongozi wa vyama vya siasa

ambao wamekuwa wakisababisha vitendo vya

uvunjifu wa amani na uchochezi nchini ili

wananchi waweze kuishi kwa amani na utulivu.

“Iwe Mbunge au kiongozi wa chama cha kisiasa

atachukulia hatua kulingana na matendo

aliyoyafanya, Sheria ya Kinga, Haki na Madaraka ya

Bunge inamlinda Mbunge kwa kile anachokisema

bungeni lakini si kwa matendo ya uhalifu

atakaoufanya nje,” alisema.

RAIA KUPIGWA PEMBA

Akijibu swali la Malembeka, Masauni alikanusha

polisi kupiga raia Pemba kama inavyodaiwa na

baadhi ya wanasiasa, akisema kuna mkakati wa

kupotosha jamii ili wawachukie polisi.

Alisema watu wanaokamatwa ni wale wanaofanya

vitendo vya uvunjifu wa amani wakiwamo viongozi

wa juu wa chama kimoja cha siasa ambacho

hakukitaja na kwamba wanahojiwa na watafikishwa

mahakamani.

DK. MWAKYEMBE APINGA

Baada ya Naibu Waziri huyo kujibu, alisimama

Waziri wa Sheria na Katiba, Dk. Harson

Mwakyembe na kusema swali hilo la msingi la

Mbunge wa Serengeti halikupaswa kuingia bungeni

na kuulizwa, kwani limekiuka masharti ya kanuni

ya 40 ya kanuni za kudumu za bunge.

Alisema kanuni zinataka kupelekwa maswali

ambayo yana ushahidi ili serikali iweze kuyajibu

na si kuletwa kwa kubahatisha ndani ya bunge.

“Vifo vinavyozungumziwa kwenye swali hilo

havijathibitishwa kitaalam kama vinahusiana na

siasa, nawaonya viongozi hao wakiwamo wabunge

kutotumia siasa katika kuliendesha taifa kwani

haliwezi kujengwa kwa mtindo huo,” alisema.

DK. TULIA AMJIBU

Baada ya Waziri Mwakyembe kutoa kauli hiyo,

Naibu Spika, Dk. Tulia Ackson, alisema swali

lilipitiwa na kitengo cha sheria cha bunge na

kujiridhisha kwamba linastahili, hivyo wakati

mwingine serikali nayo ijiridhishe kabla ya kuleta

majibu bungeni.