Chenge, Ngeleja, kuadhibiwa ndani ya siku 21 zijazo

Wenyeviti watatu wa Kamati za Bunge waliopendekezwa kuwajibishwa na Bunge hilo katika sakata la Akaunti ya Tegeta Escrow wataondolewa katika nyadhifa zao ndani ya siku 21 zijazo, imeelezwa.

Naibu Spika wa Bunge, Job Ndugai

alisema jana kuwa utekelezaji wa

maazimio ya Bunge kwa upande wa

mhimili huo wa dola utafanyiwa kazi

mapema mwakani.

“Hilo litatekelezwa wakati wa Kamati za

Bunge ambazo zitaanza mwishoni mwa

wiki ya pili ya Januari mwakani kwa

kamati husika kuchagua wenyeviti

wapya.”

Wenyeviti hao ni wa Kamati ya Nishati

na Madini, Victor Mwambalaswa,

William Ngeleja wa Katiba, Sheria na

Utawala na Andrew Chenge wa Kamati ya Bajeti.

Tuhuma zao Chenge ambaye pia ni Mbunge wa Bariadi (CCM) alitajwa katika ripoti ya Kamati ya Bunge ya Hesabu za Serikali (PAC) kuwa aliwekewa Sh1.6 bilioni katika akaunti yake binafsi kama ilivyokuwa kwa Ngejela (Sengerema -

CCM) ambaye aliingiziwa Sh40.4 milioni.

Wote waliingiziwa fedha hizo na mmiliki

wa Kampuni ya VIP Engineering &

Marketing, James Rugemalira.

Mwambalaswa, ambaye pia ni Mbunge

wa Lupa (CCM), ametajwa kwa kuwa

alikuwa makamu mwenyekiti wa Bodi ya

Tanesco ambayo Bunge liliazimia kuwa

wajumbe wake wawajibishwe.

Katika azimio namba tatu, Bunge

lilielekeza kuwa kamati husika za

kudumu za Bunge zichukue hatua za

haraka na kwa vyovyote vile kabla ya

Mkutano wa 18 wa Bunge, kuwavua

nyadhifa zao wenyeviti tajwa wa kamati

husika za kudumu za Bunge.

Utekelezaji wa azimio hilo unakuja baada ya Serikali kuanza kuwawajibisha vigogo wake waliotajwa katika ripoti hiyo.

Jumatatu iliyopita, Rais Jakaya Kikwete

alimfukuza kazi, Waziri wa Ardhi,

Nyumba na Maendeleo ya Makazi,

Profesa Anna Tibaijuka ambaye kama

ilivyokuwa kwa Chenge na Ngeleja,

aliingiziwa Sh1.6 bilioni katika akaunti

yake binafsi kinyume na kanuni za

maadili ya viongozi wa umma.

Pia, wakati Rais Kikwete akimuweka

kiporo Waziri wa Nishati na Madini,

Profesa Sospeter Muhongo, juzi Katibu

Mkuu Kiongozi, Balozi Ombeni Sefue

alimsimamisha kazi, Katibu Mkuu wa

Wizara ya Nishati na Madini, Eliakimu

Maswi kupisha uchunguzi wa tuhuma

dhidi yake.

Hao wote walitanguliwa na Mwanasheria Mkuu wa Serikali, Jaji Frederick Werema ambaye alijiuzulu kutokana na kashfa hiyo akisema ushauri wake haukueleweka hivyo kuchafua hali ya hewa.

Africa Newss

CHANZO: MWANANCHI