Hukumu kesi ya Mauaji ya Mwangosi Inayomkabili Askari wa Kikosi cha Kutuliza Ghasia (FFU) Itatolewa Julai 21

Hukumu ya kesi ya mauaji ya mwandishi wa

habari wa kituo cha televisheni cha Channel 10,

Daudi Mwangosi itatolewa Julai 21 baada ya

Mahakama Kuu kusikiliza majumuisho na maoni

ya Baraza la Wazee. Kesi hiyo inamkabili askari

wa kikosi cha Kutuliza Ghasia (FFU) mkoani

Iringa, Prisifius Simon.

Akitoa majumuisho ya kesi hiyo jana, Jaji Paul

Kihwelo alisema ni wajibu wake kutoa

majumuisho kwa kuangalia mazingira na ushahidi

uliomgusa moja kwa moja mtuhumiwa.

Jaji Kihwelo alieleza mahakama kuwa askari huyo

anatuhumiwa kufanya mauaji hayo kwa kukusudia

Septemba 2, 2012.

Alieleza kuwa jukumu la kuthibitisha kosa kwa

mtuhumiwa ni upande wa mashtaka na

wanatakiwa wathibitishe bila kuacha wasiwasi

wowote na si jukumu la upande wa pili

kuthibitisha kuwa mtuhumiwa hakutenda kosa.

Alitaja vielelezo ambavyo vilitolewa mahakamani

bila kupingwa kuwa ni pamoja na ramani ya tukio,

taarifa ya uchunguzi ya kifo cha marehemu,

ungamo la mtuhumiwa na kitabu cha kuchukilia

silaha ofisi za FFU.

Akisoma majumuhisho kwenye upande wa

ungamo, Jaji Kihwelo alisema maungamo

yanayofanywa mbele ya mlinzi wa amani,

yanaweza kutumika kutoa ushahidi.

Mtuhumiwa huyo alieleza mahakama wakati

akitoa ushahidi wake kuwa kabla ya kufika kwa

mlinzi wa amani, aliitwa kuhojiwa na RPC na RCO

ndipo akaenda kufanya ungamo na kwamba

hakufanya chochote zaidi ya kuambiwa asaini.

Akitoa maoni yake mmoja wa wazee wa

mahakama, Khadija Husein alisema baada ya

kusikiliza mashahidi wa pande zote kuanzia

mwanzo hadi mwisho, wamegundua kuwa

mtuhumiwa alienda kufanya ungamo kwa mlinzi

wa amani akiwa huru na kusaini.

Khadija alisema si rahisi mtu kusaini kitu

ambacho hajakitolea maelezo, hivyo alichokisaini

ndicho alichokitenda na alitoa ungamo akiwa huru

bila kupigwa wala kutishiwa

Alisema endapo maelezo hayo yalikuwa si yake,

yangepingwa mbele ya mahakama na wakili wake

au yeye mwenyewe, lakini kwa kuwa yalipokelewa

bila kupingwa hivyo ana hatia ya kutenda kosa

bila kukusudia.

Mzee mwingine, Said Mbaga alipingana na

maelezo hayo, akisema mtuhumiwa hana hatia

kwa sababu shahidi wa kwanza hakuthibitisha

kuwa alitenda kosa kwa sababu hakumuamuru

kupiga bomu.

Mzee wa tatu, Sophia Ng’anguli alisema

mtuhumiwa alitenda kosa bila kukusudia licha ya

ushahidi wa upande wa mashtaka kuacha

mashaka.

Alidai kitu cha msingi kinachomfunga mshitakiwa

ni ungamo alilolitoa kwa mlinzi wa amani, ambalo

aliandika na kusaini huku akikiri na kujutia

kusababisha kifo cha Mwangosi.