Uingereza kujitoa Katika Umoja wa Ulaya kwatikisa Ligi Kuu

London, Uingereza. Klabu zinazoshiriki Ligi

Kuu ya England, huenda zikakumbwa na

wakati mgumu kutokana na kujitoa nchi hiyo

katika Umoja Ulaya, wameonya wataalamu.

“Ada za uhamisho na malipo kwa wachezaji,

yanaweza kuongezeka,” alisema Simon

Chadwick, Profesa wa Michezo katika Chuo

Kikuu cha Salford.

“Klabu zinaweza kusajili wachezaji kwa

gharama kubwa na sababu ni kushuka

thamani ya Pauni,” Chadwick aliiambia BBC

Sport.

Mwenyekiti wa Chama cha Soka England, Greg

Dyke naye alisema uamuzi wa England

kujiondoa Umoja wa Ulaya unaweza

kusababisha mengi katika Ligi Kuu ya nchi

hiyo.

Alisema kuwa matokeo ya kujiondoa EU

hakuwezi kuonekana kwa miaka miwili lakini

matokeo hasa yataonekana baada ya muda

mrefu.

“Itakuwa aibu sana ikiwa wachezaji wakubwa

duniani watashindwa kuja hapa, lakini sidhani

kama hilo linaweza kutokea. Kama idadi

itapungua, itategemea na watakaokuja,”

alisema Dyke.

Alisema: “Wasiwasi wangu ni kuwa kutakuwa

na kuanguka kwa wachezaji wa Ligi Kuu katika

vikosi vya kwanza…tuna anguko na kuteteleka

uchumi kwa asilimia 30, hii ni aibu sana.

“Ikiwa wachezaji wa Ligi Kuu wataongezeka,

hiyo itakuwa safi. Lakini hatutaki kupoteza

kasi ya wachezaji wageni kuja.”

“Uamuzi huo kwa upande mwingine, utasaidia

kwa kiasi kikubwa kuwapa nafasi wachezaji

chipukizi kupata nafasi katika vikosi vya

kwanza katika timu mbalimbali,” alisema

Gordon Taylor, Mtendaji Mkuu wa Chama cha

Wachezaji wa Kulipwa.

“Hawa vijana mara nyingi hawapati nafasi, huu

sasa ni wakati wao. Wanakuwa na klabu tangu

wakiwa na miaka minane hadi 16 na kwa

uchache vijana 500 kati ya 600 hawachezi

wanapofikia miaka 21,” alisema Taylor.

Uchunguzi wa BBC unasisitiza kuwa matokeo

ya England kujiondoa EU kutasababisha

mambo mengi katika ligi hiyo ikiwamo ujira

wa wachezaji, kuandaa mashindano makubwa

na thamani ya jina la Ligi Kuu kupotea.

Nick Chadwick, mchezaji wa zamani wa

Manchester United alisema: “Soka yetu

iliyokuwa ikitamba kwa muda mrefu,

itaathiriwa na Umoja wa Ulaya.

“Sasa ni kutengeneza njia mpya na mawazo

mapya kuelekea kule ambako hatujafahamu

jambo la kufanya na hiyo inaweza kuwa kwa

miaka mitano hata 10.”

Alisema: “Kitu cha kwanza tutakachokiona

hapa ni hili la usajili. Tulichokiona kwa saa

chache ni kuporomoka kwa kiasi fulani usajili.

“Wachezaji watashindwa kuja England ikiwa

thamani ya mishahara yao itaanguka,”

aliongeza Chadwick.

Hata hivyo, alisema kuwa Ligi Kuu itaendelea

kuwa ligi kubwa na bora yenye mafanikio na

ushindani nyumbani na duniani bila kujali

matokeo ya kura ya uamuzi.

“Hakika, tutaendelea kushirikiana na serikali

na vyombo vingine na wadau.”

Baadhi ya wadau walisema kuwa kujindoa kwa

England kutapunguza uhuru wa wachezaji

kuhamia sehemu moja na nyingine.

Uchambuzi wa BBC mapema Machi wakati wa

vuguvugu hilo unaonyesha kuwa katika

England na Ligi Kuu ya Scotland, wachezaji

332 watakosa sifa za kuchezea timu hizo.

Klabu ya Scotland ya Hamilton Academical

italazimika kubadili sera ya kusajili, na kocha

Martin Canning alisema kuwa wachezaji

wanane wataathirika huku urahisi wa kuja

England ukiwa kwa wachezaji nje ya Umoja wa

Ulaya.

“BBC ilisema kuwa mchezaji kama N’Golo

Kante wa Leicester, ni wazi atashindwa

kuchezea timu hiyo hadi afuate utaratibu za

kibali,” alisema Chadwick